廣華醫院剖腹生產紀錄 @ AkiNa的部落格

上次冇辦法做推肚（外倒轉術 / 轉胎），醫生即時約期在38weeks做開刀生產...！

胎位不正加上bb size 較細，導致唔合資格做轉胎推肚...

第一日 - 手術前一日入院

安排我在開刀前一日入院準備（事前一直問都唔會知道當日到底係上午/下午開刀，姑娘說怕是有人急需緊急開刀而需要使用手術室）

下午2點入院，入院前沖涼洗頭，黎緊有好多日都沖唔到涼，尤其開刀

被安排床位之前，做個簡單的量血壓、驗小便、聽胎心、摸肚照超聲波確認胎位（呢刻我仍心存希望bb已經調左頭... 實在是好唔想開刀啊...！）

之後姑娘叫我等一陣，睇下邊度有床位俾我，如果呢層冇就會係11樓的床位。終於有床位俾我，唔使上11樓，但竟然係產後房！一間5人房，房內有洗手間

好好彩我係單邊床位，唔使夾係中間～空間算是5張床位入面較闊落的。房內另有2名產婦，都係已生產的。之後再推多一名入黎，床頭都係有個牌「禁飲食」，似係啱啱開完刀的，呢個時候我就知道，呢間房係分類為開刀生產的產後房！而房內就只有我一個係待產，所以房門外就特別貼左「AN」的螢光牌，表示呢間產後房入面有個待產孕婦

（待產和產後的衣服都唔同，好明顯最尾2間房都係待產房，上星期做推肚就係留在果兩間房的床位）

當被告知要開刀，上網睇左好多分享，都知道開刀手術前要剃毛，但我估唔到嘅係，呢樣野係姑娘黎做（應該係助理做的，另一位姑娘同佢講）完左姑娘就叫我去沖身，不過就唔俾用房內的洗手間

要聽胎心（上星期入黎做推肚，都知聽胎中係點）一位姑娘突然帶住4個人入黎，原來係護理系的學生，問我介唔介意俾佢地學野，當中有一個係男學生。我就冇所謂，明白實習對將來的醫護人員係相當重要的！

由於bb心跳有時太興奮跳太快，醫生姑娘都唔敢拆機，本來只需聽半小時，變成差不多2小時，搞到急尿都冇得去廁所！

3點前有姑娘黎抽血for手術用的配血（為左bb，由懷孕期到開刀，都唔知捱左幾多針... 明明我就係好怕打針抽血... ）

等到麻醉師黎同我講解半身和全身麻醉的程序和風險，然後在文件上簽名，之後就等見醫生

差唔多黃昏先等到醫生黎搵我，講解聽日手術的流程，其實之前派嘅文件都已經寫左，而麻醉師同醫生講嘅，都係幾乎照書讀...

探病時間係6-8pm，叫左隊友買朱古力包俾我當飯後甜品！姑娘話今晚12點後禁飲食！心情真係越來越緊張，唯有個心諗住，就快可以同bb見面，緩和對開刀的不安情緒...

大約11點前，有姑娘黎問我攞定2塊bb尿片，同埋講俾我聽bb到時有機會出世後因爲size細而要送去兒科監察，同埋再次提醒我12點後禁飲食，預早執定野，我再問之下，佢先答我，聽朝我會係第一個開刀，叫我叫屋企人7:30-8:00黎，到時啲貴重物品交俾屋企人保管喎（咁我就即刻whatsapp通知媽媽同隊友）

第二日 - 開刀手術當日

早上7點房燈會全開，呢個時候有姑娘黎叫我，話我今日做手術，叫準備執好行李，然後俾左手術袍我換上

坐輪椅出發去手術室，會途經lift lobby，就係呢個時候交啲貴重物品俾屋企人（隊友竟然去左廁所，就係咁，我入手術室前見佢唔到...！）

在手術前的房，除左件待產婦的衫，著住手術袍自己過床（張床好細好窄）

一直到推入手術室前，被問過好多次叫咩名身分證號碼，知唔知今日做咩手術

唔知係咪一早的關係，姑娘們的工作安排有啲混亂同慢，醫生走黎催話9點前要入手術室（當時已經8:55）

被推入手術室，果時已經好不安，咁大個女都係第一次入手術室！旁邊企左2個貌似係學生的妹妹，姑娘問都冇問，直接地講：「呢兩位係理工學生，佢地係黎同你一齊見證著重要的時刻！」

手術床上幾乎係大字形的訓係度，左手量血壓，右手靜脈插喉（我懷疑係新手，佢搞好耐，我唔敢望，淨係聽到佢地講「今次終於成功啦喎！」「抹乾淨佢同張枱啦！」手術後我發現手上有好多血蹟！！！）

做半身麻醉，麻醉師問身高，然後護士叫我身體要側身好似蝦米咁曲住，有護士在前方抱實唔俾我郁，叫我下巴盡貼心口，將背脊骨盡量突出黎等麻醉師容易啲搵到落針位置（一共打左3針）佢地不停咁話有少少痛，第一針之後感覺越來越少，第三針開始feel到痺痺地

唔知做半身麻醉要幾耐先藥力有效，反正我覺得好快佢地就開始做野。叫我試抬高腳睇下麻醉有效未，我已經控制唔到雙腿！佢地就開始插尿喉，我feel到佢地幫我棟起雙腳，而插尿喉就完全冇感覺！

麻醉師再試試我的半身麻醉效果，feel到有野拮左腹部一下但冇其他任何感覺，然後再拮我胃部附近的皮膚，我feel到好似被針拮的少許痛楚，麻醉師竟然唔信，仲話冇可能，話呢啲係電，feel到嘅會痛到成個人彈起喎⋯⋯ 如是者，緊接著就剖腹開始！（網上的分享都係話只會feel到有人拉拉扯扯肚皮，唔會覺痛）而我，就知佢已經落左刀，此時有人會黎撩我講野，但去到某一個位我開始覺得痛，我講出黎冇人信，撩我講野嘅人繼續嘗試同我講野，但我根本冇可能正常咁答佢，因為我真係feel到痛！麻醉師就俾笑氣我聞，但真係冇乜效！佢就問我頂唔頂到！唔係就做全身麻醉！我記得索左幾啖笑氣之後想答佢都答唔到，淨係知好痛，痛到冇辦法唔郁插左點滴的右手以示我嘅痛楚情度！執刀的醫生講左句「喂，佢隻手啊！」麻醉師先去準備全身麻醉嘅野！係不安&痛楚之下，護士叫我等多陣就得（佢指全身麻醉的藥）麻醉師在點滴果度加左野，話會有少少痛，我feel到啲藥在右手入緊身體，因為feel到啲藥有炙熱感，好快我就訓左自己都唔知...

醒番果時係10:40，係聽到有人叫我全名。一醒果下已經feel到傷口痛... 護士同我講手術成功，聯左5針。我第一句就問佢「咁bb係邊？」佢話已經俾我先生望過，送左去兒科監察（呢個事前講左我知，咁我都安心啲）可惜嘅係我冇得聽到佢第一個喊聲，冇得見證著佢出世一刻，冇得即刻做肌膚接觸&埋身餵第一口...... 同埋送左去兒科，即係生完我都未見到佢......

俾人推番返去產後房，幸運的訓番同一張床！（呢個床位較闊落又係單邊位，房內的人又不陌生）

俾人抬過床，要雙手交叉放胸前，抬果下郁到個身，個傷口就痛，忍不住叫左句「救命」啲工友姐姐笑我「咁又唔使救命啊」

我嘅膝頭以下已經可以輕微郁動，大脾就仍然冇feel，但唔知點解腹部個傷口有feel到痛...

姑娘會問係咪餵母乳，問我想唔想試下，原來係用手擠，在姑娘指導下成功送左1.5ml黃金初乳去身科俾bb，姑娘話呢啲係媽媽俾bb的第一份最珍貴的禮物！佢俾左啲小單張我睇，話2-3小時手擠一次。但可能手術後+麻醉藥的關係，成個人比較攰，全日都係訓下醒下咁，根本冇乜精神去定時手擠。而左手長期駁住定時量血壓的機器，右手吊緊點滴，好唔方便。

定時會有工友姐姐黎幫手清洗惡露，自己就要靠腳力腰力支撐身體，盡量少用腹股整到傷口

我隔離床的，今日中午時分已經出院了，見佢呢2日行得走得，想必開刀傷口好快就會唔痛呢～（事實證明我太天真，大家表面冇痛楚樣子，其實都係果句「為母則強」）

下午3點幾，又推多個啱啱開完刀的，我同佢係同一日開刀！佢就好啦，個bb同佢一齊係度！

兒科的探病時間不一樣，是5-7pm，而且只可以父母入去，升級做婆婆的老媽子都未見過bb，所以隊友就去睇bb先，影啲相俾我地睇，我先知道自己生左個女係點樣嘅！開刀唔落得床，就算有輪椅借坐都冇用，唔可以去睇bb......

第三日

成晚都係每2小時醒一次，唔知呢啲係咪身體好自然的現象，個身體會話你知要照顧bb (但我個BB仲係小兒科未送番俾我呢... >,<''')

朝早7點準時開燈，望住人地有早餐食，我成晚口乾到連發夢都係夢見自己飲水！

中午時派藥，姑娘會問要唔要止痛藥（唔知係咪手術後塞嘅止痛藥好有效，比我想像中唔係好痛，我本來想話少少地要一粒，點知姑娘話「你諗清楚先好喎，今日下午要落床架啦！唔係嚇你！」我就即時淆底要左2粒...！

朝早已排氣，中午前拆左尿喉，可飲少量清水，要係限時內自己排到尿（其實1-2pm果時已經急尿，不過又唔好意思在探訪時間叫工友黎俾我排尿）

成功排尿後就要落床，要坐係櫈上半小時！工友姐姐會教點落床，真係痛苦到死忍！口服2粒止痛藥根本冇料到...！坐底左之後工友姐姐會好意提醒盡量唔好彎腰向下/低頭

同我同日開刀嘅，我地都個schedule都係一樣，佢都係落左床坐係櫈上，我地傾左一陣佢就送去特別檢查，而我就返番上床休息

大約4pm，我聽到房出面話寄bb上黎，我好期待係咪我嘅！果然，真係送番bb俾我！！！我終於可以同bb見面啦（果刻有啲感動！）即刻whatsapp 老媽子，然後佢好準時6pm探訪時間一開始就出現！

姑娘會指導點樣埋身餵母乳，但係bb size好細，咀仔細，好高難度... 所以都係要補餵奶粉（配方奶係定時定候派的，其餘時間都唔會攞到奶）

第一晚自己照顧bb，忍住傷口痛，每當bb有訴求都要起身回應，又驚佢呼吸唔到，幾乎每半小時都會醒一醒去望望，成晚冇得真正休息。直至半夜bb喊，呢晚當值的工友姐姐好好人，一黎又怕影響到同房其他人，所以佢就話幫我湊bb，等我可以好好休息，聽朝推番俾我

終於可以訓番一覺啦

第四日

晨咁早7點前，工友姐姐拍醒我，話推番BB俾我，叫我對一對手帶腳帶，以防送錯BB

(都係長話短說, 實情事過5個多月, 我都冇乜印象XDDD)

漸漸可以食番固體食物，本來想逐一影低，但太肚餓的我照機未食我自己都已經食左落肚~ 媽媽有另外帶飯俾我，最深刻的是，佢買左靚又貴的菜芯，但係黎到唔覺意倒晒落地... 果一刻可以感受到佢好肉痛，可能啲靚有機菜芯真係好貴，跌晒落地真係好浪費 =[ 呢一幕同媽媽肉痛的氣場，真係好深刻.....

今晚要自己照顧番BB，由於我未上奶，所以係餵醫院提供的配方奶，每4小時派一次，雖然我每次都會埋身先試餵人奶，但為保唔會餓親BB，我都會要求派配方奶俾我

由於配方奶開封後要一小時內飲用，今晚我個BB錯過左食奶時間，結果支奶唔飲得，要等到凌晨2點先再派，11點左右BB因為肚餓而不停哭，問工友姐姐又唔肯派奶，結果BB餓到喊到攰訓左，冇幾耐又餓醒又再喊過.... 終於好不容易等到1點半左右，工友話早少少派奶，咁BB先有得食咋... T^T 但係而家早左派奶，下一次亦唔會早派，所以叫我有心理準備喎...